ميديا باينغ بيتحاسب على المبيعات، مش على اللايكات

بويف ستوديو بنخطط وبندير حملاتك الإعلانية المدفوعة على ميتا (فيسبوك وانستغرام) وجوجل وتيك توك وسناب شات، للشركات والمتاجر بالأردن والخليج اللي بدها مبيعات ومحادثات وعملاء محتملين، مش لايكات. كل حملة إلها هدف تجاري واحد، وميزانية موزعة حسب هالهدف، ورقم واضح بنحكم فيه عليها. والإعلان اللي ما بيجيب بنوقفه فوراً، بدل ما يضل ياكل من الميزانية.

جودت العزيزي، مؤسس ويف، بدأ شغله كميديا باير. من جوا لوحة الإعلانات شاف إن نفس الميزانية ممكن تربح أو تخسر حسب المحتوى وطريقة الإدارة مع بعض. عشان هيك الميديا باينغ عندنا مش قسم معزول: هو مربوط بالاستراتيجية والكتابة والتصوير تحت سقف واحد، والميديا باير بيحكي مع الفريق الإبداعي كل أسبوع عن شو اللي عم يبيع.

شو بتشمل خدمة الميديا باينغ عند ويف؟

• مراجعة الحساب الإعلاني الحالي: الحملات القديمة، شو صرفت وشو جابت، ووين المصاري راحت بدون نتيجة.
• تجهيز التتبع: البيكسل وأحداث الشراء أو التسجيل وربط الواتساب، لأنه بدون تتبع ما في طريقة تعرف إذا المصاري رجعت. شرحنا الإعداد بمقال تجهيز تتبع التحويلات.
• بناء هيكل الحملات: حملات للتجربة وحملات للتكبير، جمهور جديد وجمهور بيعرفك، بنفس الطريقة اللي شرحناها في بناء حملات ميتا من الصفر.
• نصوص الإعلانات واختيار المحتوى: أي فيديو أو تصميم بينزل، بأي نص، ولمين، وشو لازم ينصور بعدين.
• مراقبة يومية وقرارات: شو نوقف، شو نكبر، وأي إعلان بدأ يتعب ولازم يتبدل.
• تقرير دوري بالأرقام: مع جلسة نقرأ فيها النتائج سوا ونتفق على الخطوة الجاية.

كيف بنشتغل على حملاتك خطوة بخطوة؟

1. نفهم البيزنس قبل الإعلان: قديش بتربح من البيعة الوحدة، ومن كل كم محادثة بتطلع بيعة، وشو أعلى تكلفة نتيجة بتخليك رابح. هاد الرقم بيصير خط النجاح اللي بنحكم فيه على كل إعلان.
2. نجهز الأساس: التتبع، وصفحة الهبوط أو رابط الواتساب، وطريقة الرد على الرسائل. إعلان ممتاز على صفحة معطلة خسارة مضمونة.
3. نطلق بأكثر من نسخة: أكثر من فيديو وأكثر من نص، والميزانية مقسومة بين التجربة، وتكبير اللي شغال، وإعادة استهداف الناس اللي تفاعلت.
4. نحكم بالأرقام مش بالإحساس: ما بنحكم من أول يومين. بنستنى الإعلان يصرف مبلغ كافي، وبعدها بنوقف اللي تكلفته فوق الخط. القواعد كاملة بمقال متى نوقف الإعلان ومتى نكبّره.
5. نكبّر اللي بيبيع: نرفع الميزانية بالتدريج على الإعلانات اللي تكلفتها ثابتة، ونرجع للفريق الإبداعي بنسخ جديدة من الفكرة الرابحة قبل ما تتعب.

أي منصة إعلانية بتناسب مشروعك؟

ما في منصة وحدة بتناسب الكل. بنختار حسب وين زبونك وشو بيعمل لما بدو يشتري، وغالباً بنبدأ بمنصة أو اثنتين بدل ما نوزع الميزانية على أربع.

ميتا: فيسبوك وانستغرام

الأقوى غالباً للمحادثات على الواتساب والرسائل، وللمتاجر الإلكترونية والعيادات والمطاعم. هون بيكون أغلب الفرق جاي من المحتوى وعدد النسخ اللي بنجربها.

جوجل

للناس اللي عم تدور عليك فعلاً، مثل «أقرب مركز» أو «سعر خدمة معينة بعمّان». مناسب للخدمات المحلية وللقطاعات اللي الزبون فيها بيبحث قبل ما يقرر. فصّلنا هالشي بمقال إعلانات جوجل للبيزنس المحلي.

تيك توك وسناب شات

جمهور أصغر بالعمر وحاضر بقوة بالخليج، خصوصاً السعودية والكويت. بدهم محتوى مصور بلغة المنصة نفسها، مش إعلان ميتا معاد نشره. التفاصيل بمقال إعلانات تيك توك وسناب شات.

شو الأرقام اللي رح تشوفها بالتقرير؟

ما رح نعطيك تقرير مليان لايكات ومشاهدات. الأرقام اللي بنحكم فيها هي:

• تكلفة المحادثة على الواتساب أو الرسائل، وشرحنا طريقة حسابها بمقال تكلفة المحادثة.
• تكلفة العميل المحتمل لنماذج التسجيل والحجز.
• العائد على الإنفاق الإعلاني (ROAS) للمتاجر الإلكترونية.
• عدد الطلبات أو الحجوزات الحقيقية مقابل المبلغ المصروف.

ومن نتائج حملات أدرناها:

• حملة عملاء محتملين جابت 2,706 عميل محتمل بصرف 10,632 دولار، يعني حوالي 3.9 دولار للعميل.
• حملة مبيعات على ميتا لجمهور جديد وصل فيها العائد على الإنفاق للمشتريات إلى 59.3.
• حملة إعلانات جوجل لمركز حلول سمعية وصلت لحصة ظهور 34.8%، قدام مواقع المنافسين.

هاي نتائج حملات محددة، مش وعد. النتيجة عندك بتعتمد على المنتج والعرض والسوق وسرعة الرد، وبنحكيلك توقعاتنا بصراحة من أول جلسة.

لمين بتناسب هالخدمة، ولمين ما بتناسب؟

بتناسبك إذا:

• عندك منتج أو خدمة عليها طلب، وعرض واضح بتقدر تحكيه بجملة.
• عندك حدا بيرد على المحادثات بسرعة، خصوصاً بساعات الذروة.
• مستعد تعطي الحملات وقت كافي للتجربة قبل ما تحكم عليها.
• بدك تعرف شو رجعلك كل دينار صرفته، مش بس قديش وصلت.

وما بتناسبك إذا بدك نتيجة مضمونة من أول أسبوع، أو كل اللي بدك إياه ترويج منشورات لزيادة المتابعين، أو الرد على العملاء بطيء ومش ناوي تصلحه. بهالحالات بنفضّل نحكيلك قبل ما تصرف، لأنه أقوى إعلان ما بيعوّض محادثة ما حدا رد عليها.